सक्ती हादसा म मुख्यमंत्री विष्णुदेव साय के बड़ा ऐलान: मृतक परिवार ला 5-5 लाख, घायलों ला 50-50 हजार मदद

वेदांता पावर प्लांट दुर्घटना म जताइन गहिरा दुख, मुफ्त इलाज अउ जांच के दीन निर्देश

रायपुर। सक्ती जिला के सिंघीतराई म स्थित वेदांता पावर प्लांट म होए दुखद हादसा ला लेके मुख्यमंत्री विष्णुदेव साय ह गहिरा दुख जताइन हवंय। ओमन ए घटना ला बहुत पीड़ादायक बतावत मृतक मन के परिवार संग संवेदना व्यक्त करिन।

मुख्यमंत्री साय कहिन के ए कठिन घड़ी म राज्य सरकार प्रभावित परिवार मन के संग खड़े हवय अउ पूरा संवेदनशीलता के साथ मदद करही। ओमन हादसा म जान गंवाय वाले श्रमिक मन के परिजन ला 5-5 लाख रुपिया के सहायता राशि देय के घोषणा करिन।

साथ ही, जऊन श्रमिक मन ए हादसा म घायल होइन हवंय, ओमन ला 50-50 हजार रुपिया के आर्थिक मदद देय जाही, ताकि ओमन ला तुरंत राहत मिल सकय।

मुख्यमंत्री ह अधिकारी मन ला निर्देश देहिन के जम्मो घायलों के समुचित अउ निःशुल्क इलाज के व्यवस्था सुनिश्चित करे जावय। ओमन कहिन के इलाज म कोनो घलो लापरवाही बर्दाश्त नई करे जाही अउ घायलों के जल्द स्वस्थ होय के कामना करिन।

घटना के गंभीरता ला देखते हुए मुख्यमंत्री साय ह बिलासपुर कमिश्नर ला जांच के आदेश देहिन हवंय। ओमन साफ कहिन के जऊन भी दोषी पाय जाही, ओकर ऊपर कड़ी कार्रवाई करे जाही।

मुख्यमंत्री ह कहिन के राज्य सरकार पूरा मामला म लगातार नजर बनाए रखे हवय अउ राहत अउ पुनर्वास के काम ला प्राथमिकता देके चलाय जात हवय। अधिकारी मन ला निर्देश देय गे हवय के प्रभावित परिवार मन ला हरसंभव मदद पहुंचाय जावय।ax